طرق ومواسم صيد البلطي والعاذب
مقالات مجمعة من خبرة صيادين العاذب
احب اشرح لكم طريقة صيد النسيلة وهذه الطريقة مثمرة وجذابه اولا يجب احضار شوال نسيله ( اي الخضرة الرفيغة الطويله ) ودي موجوده في بعض الحدائق ونذهب الي مكان الصيد وكنا نذهب الي مرمي اسمه الاربع عزب في البوصيلي قبل رشيد وهذا المكان به بوص اخضر علي الحروف ثم نقوم بقطع البوص من تحت الماء ونذهب الي مكان اخر به بوص خفيف ويتم زرع البوص في الطين بطريق الدائرة نعمل حوالي عشرة مرامي بهذه الطريقه علي شكل دوائر قطر الدائرة حوالي نصف متر ونقوم بوضع النسيلة علي البوص علي سطح الماء من الداخل ونربط الخضرة في البوص ونفتح فتحة في الخضرة حوالي 20 سم ونجهز جميع المرامي هكذا طبعا ده بياخد اكثر من ساعتين حتي يتم تحضير المرامي وتترك المرامي حوالي ساعة اخري ونجهز بوصه 4 متر ونعمل قرمه بسلاح 8 سلاح واحد حساس ومعه رصاصة خفيفه ومدور صغير وسوف نلاحظ بعد حوالي ساعة بان المرامي بدات الخضرة بها تتحرك وده دليل علي دخول السمك الدكوره الي المرمي ترمي داخل المرمي وتاخد سمكه واحده وتترك المرمي وتذهب الي مرمي تاني وهكذا حتي تمر علي كل المرامي وتعيد الموضوع من الاول طبعا ده صيد النسيلة لم يستخدمه الا القليل من الصيادين ولكن ده انفراد لجروب محبي الصيد والنشر لاول مره في جميه جروبات الصيد عن هذا النوع من الصيد بالنسيله
إعلاناتإعلانات
إعلاناتإعلانات
منقول من جروب محبي الصيد بالأسكندرية
Moustafa Nafady
البلطى و ما أدراك ما البلطى
اللى غاوى بلطى : -
ويبدأ صيد البلطى من ابريل حتى نهاية اكتوبر
1 - العدة المطلوبه للبلطى
2 - كيفية صيد البلطى بمختلف الطرق
3 - الطعوم المطلوبه لمختلف طرق الصيد
4 - الصيد فى المياه الساكنه والمياه الجاريه
5 - طريقة عمل عجينة العيش البلدى المستوى
6 - طريقة عجين الدقيق المستويه
.......................................................................................................
العده المطلوبة :
( عده كامله )
تلاجه او ايز بوكس او نقيصه للى يحب النقايص
طاقيه سور واسع للشمس
جوانتى للحمايه من اشعة الشمس وشوك السمك
قص اطرافه وسرفلها يعنى خيط مكان القص علشان مايكرش
نظارة شمس ان امكن
راديو للترفيه او سماع القران
بوص 3 و 4 و 5 و 6 متر.................وده حسب المكان اللى حترمى فيه....
فل حمص وبليه واكبر شويه مقاسات مختلفه
رصاص شريط بالمتر ورصاص حمص اوزان حسب وزن الفل
سنار 9 كفته وكرش و لطش لميع وممكن عسلى
سنار 8 كفته وكرش و لطش لميع وممكن عسلى
سنار 7 كفته وكرش و لطش لميع وممكن عسلى
سنار 6 كفته وكرش و لطش لميع وممكن عسلى
سنار 5 كفته وكرش و لطش لميع وممكن عسلى
شعر 10 و 12 و 15 و 18 و 20 و 25 و 30 و 35 و 40 و 45 ملم
اى نوع كله شغال والانواع الاغلى سعرا احسن جوده
مداور صغيره ووسط ومداور بمشبك
مقص صغير
بنز ببوز مهم جدا وينفع فى نسليك السن عند بلع السمكه له
شبكارتون للطوارئ
مطواه صغيره
اعمل ثلج فى ثلاجة المنزل فى الفريزر قبل بوم الصيد بعدة ايام
وممكن تحط ملح فى الميه وبعد ماتبقى تلج لفه فى ورق جرايد
وانت رايح تصطاد.....حيقعد معاك طول النهار وداريه من الشمس
ده بالنسبه للعده
.......................................................................................................
كيفية صيده بمختلف الطرق :
للبلطى طرق مختلفه للصيد
الطريقه الاولى
وهى الطريقه المتبعه للرمى بواسطه البرغوت سواء كان ملقوف او مشترى
او بالطعم دود الطين او دود السبله .
الطريقه التانيه
وهو عمل طرق العلفه
وهى لاتنفع إلا بنزول الماء فى اماكن مختاره من الترع على الجروف
وعمل مربع او مثلث من الحجنه او البردى او البوص ورمى النسيله
( النجيله الطويله الناعمه ) داخلها ولقف برغوت من نفس الترعه
والمحافظه عليه وبعد ماتفطر وتشرب شابك تلاقى النسيله دى
بتتسحب على تحت ( السمك بيشدها علشان ياكلها ) تعال بالراحه
وانت مستخبى ماتبينش نفسك للسمك وارمى بحتة شعر قصبره متر مثلا
فى بوز البوصه وسن 5 بكرش وفيها البرغوت الحى ونرل بالراحه فى وسط
النسيله.........تلاقى البوصه اتخطفت منك
....وشد ياعم السمك الكيلوات والانصص واكبر مافيش اربع كله وزن عالى
الطريقة الثالثه
طريقة الغله
وقد تكلمنا على الغله سابقا
ولكن نبينه برضك مافيش مانع
التعريف: القمح البلدي ويستحن من النوع ذو الحبه الكبيره وان يكون كامل ( يعنى بقشرة ) مش بتاع البليلة لان القمح بدون قشرة لا يصلح ابدا انواع السمك : البلطي اوقات الصيد : من اول الظهر اشتغل بالغلة وطبعا لازم يكون دور غلة والسمك متعود عليها وتزفر قبل ما ترمى بوقت كافىالغله ليها صيد بالليل بس يكون فى مكان ضارب فيه كشافات نور لان السمك بيجي عليها عن طريق الرؤيه مش الريحه ودي بتكون ضعيفة
افضل شهور الصيد بالغلة
/10/5/6/7/8/9
اولا تحضير القمح ودة لية اكثر من طريقة هعرفهم كلهم ان شاء اللة
الطريقه الاولى
نصف كيلو غله ( قمح ) يتم غسله بالماء جيدا حتى ينظف من الاتربه تماما وبعد ذالك يتم وضعه فى اناء به ماء ويتم غليها على النار مع التقليب من وقت الى اخر حتى نضوج حبه الغلة , وتترك فى الاناء مغطاه لمده مناسبه حتى انتفاخ حبه الغله حوالى ربع ساعه , ولا تتركها لدرجه انها تتفتح او يتم نضوجها الكامل وذالك حتى تستطيع ان تضعها فى الصنارة , وبعد ذالك تغسل بالماء البارد ثم تصفيتها من الماء ويتم تقسيمها على اكياس وتوضع فى الثلاجه وتكون معده للصيد , ملحوظه عند غسيل الغلة قبل عملية الانضاج (التسوية ) وانت تقوم بعملية الغسيل استبعد الحبوب التى تكون على سطح الماء .
الطريقه الثانية
نقوم بغلى الماء جيدا ونصبه على الغله (القمح) المراد تجهيزها ثم نغطيها و نتركها مدة حتى تبرد المياة وتشوف الحبه نضجت ولا لا لو لم تنضج جيدا قم بتسخين كمية من الماء ثم نقوم باستبدال الماء القديم بالماء المسخن حديثا .
بعد ذالك تاكد من نضوجها جيدا بس بشرط انها تكون حبة الغلة منتفخة فقط و لم تتفح كاملا ثم تقوم بتغير الماء و تقوم بوضع الغلة فى طبق كبير تحت الفريزر بحيث ان تكون المياة الموضوعة فيها الغلة اعلى من مستوى الغلة فى الاناء اى ان تغطى المياة كل الغلة وتتركها عدة ايام و لاكن لاتنسى ان تقوم بتغير الماء كل يوم.
كل فترة امسك حبة غلة واحدة واضغط عليها بين اصابعك اذا اخرجت الحبة محتويتها بسهولة فهذة علامة على انها جاهزة للاستخدام كطعم واذ كانت الحبة ما ذالت بها بعض من الصلابة اترك القمح فى الماء مدة اخرى الى ان تتاكد انها اصبحت جاهزة لاستخدام فى الصيد , و بعد ذلك انشر القمح على ورقة جرايد (صحف) و بهذا تكون جاهزة للاستخدام
الطريقه الثالثة (طريقه التخمير بماء بارد)
و ذالك بان تضع القمح (الغلة) فى ماء بارد بدون ان تقوم بتسخين او غلى الماء و ذالك لمدة مابين 5-6 ايام و بعد ذالك يمكنك استخدام القمح المخمر وللحفاظ على رائحة القمح النفاذة يتم وضعة فى كيس من القماش .
الطريقه الرابعه ( التخمير فى ماء ساخن)
يمكن تخمير القمح فى ماء مغلى بعد غسلة مباشرة وتغطية الاناء ثم بعد ساعتين يعاد نفس الموضوع مرة اخرى وبعد ساعتان يغلى القمح على نار هادئة وتلاحظ باستمرار واول ما تفتح اى حبة قمح اطفى النار وارفع القمح بواسطة مصفى وضعة على ورق جرايد (صحف)
اماكن الصيد : من على الشاطيء ولازم يكون الدور ميتة هادية يعنى مش حامية يعنى الغله عايزه دور مياة ضحله الى حد ما يعنى الاقضل ان تكون ترعه صغيره والارضيه طينيه ومافيش حجارة عشان تسهيل الرؤيه للسمك او وسط ورد النيل والجميل ان تكون ادوار الغله اللى بيتغسل فيها غله زى ترعه الجيزاويه و بحر يوسف و بعض الترع الصغيرة و طبعا ده فى و قت غسيل الغله يعنى بعد الحصاد بالتحديد فى اخر الصيف يعنى اغسطس و سبتمبر ويفضل الدور ان يكون مافيهوش عمق وده علي فكرة مثالي في الغلة
تجهيز الدور: اولاً تجهيز الدور عن طريق عمل أكثر من مراية يعني أعمل خمس مرايات والتنقل بينهم طول اليوم والدور الى يشتغل معاك ماتسبوش ولعمل المرايه عن طريق رش كبشتين من الغلة علي ارضية الدور بحيث تكون نصفها في الماء والنصف الاخر علي البر على مسطح طين " ارضيه طينيه " على حرف المياة وبنظفر في دايرة كبيرة 5 متر اثناء التجهيز وعند انتهاء التجهيز وبدء الصيد صغر دايرة الظفر تحت رجلك 4 او 5 حبات والمرايه تعنى مياه صافيه جدا علشان السمك هياكل على الشوف مش الشم ولو المياة مش رايقة دور على ليخة (نبات مائي) او ورد النيل و قم بتنظيفه من المنتصف بحيث تكون ارضيته مكشوفه و لما الماية تروق قم برش الغلة لتحضير
ملحوظة" الغلة المستخدمة للتزفير نص سوا " علشان السمكة ما يعرفش ياكلها ويدخل على الحباية المستويه على السن
طيب انا قلت انى لازم يكون دور غلة لو انتا عايز الدور الى بتعد فية يكون دور غلة هتعمل ئية انا اقلك
ولتجهيز دور دائم للغله نتبع ما يلي : ويكون ذلك بمتابعته والقاء بعض القمح به كل يوم لمدة ويفضل فى الميعاد المفضل لك ان تصطاد فية بعد ذلك لكي يتعود السمك على الاكل في هذا التوقيتوعلي فكرة هذا الاعداد وان بدا للبعض عمل ممل الا انه ممكن يخللي لك الدور شغال طول الموسم لان السمكة بتتعود علي اكل الغلة لو كان سكنك بعيد عن الدور تشترى 2 كيلو قمح تستبعد نصف كيلو فى كيس ترفع الباقى على النار بعد 10 دقائق انشل ثلث الكمية التى على النار وضعها فى الكيس السابق بعد5 دقائق اخرى انشل الثلث الثانى من على النار وضيفة الى الكيس السابق بعد 5 دقائق اخرى انشل باقى الغلة من على النار وضفهم الى نفس الكيس ثم القى بكل الكمية فى الدور مرة واحدة وبعد اربعة ايام جربلان السمكة هتاكل فى اول يوم الحباية المستوية وتسيب الباقي وتستمر علي ذلك كل يومويبئى وفرت مرواحك للدور اكثر من يوم
ملاحظه هامه ان لا تترك السناره فى الماء مده طويله بدون تحريك (حرك كل شويه ) يعنى ارمى جوه واسحب عليك ناحيه الغله الموضوعه قريب
-يجب الجلوس متخفيا يعنى ابعد ما تستطيع عن الدور يعنى يا دوب تبقى شايف الغماز يعني خيالك ميكنش في الميه علشان السمك فى الغالب بيطلع على الجسر علشان ينقى الغله الموجوده والمفروض انه موش يشوفك علشان ما يخافش ويهرب من الدور. وممكن إنك ترمي بجانب الزرع الي نازل في الميه عشلان بيكون في تجمع سمك كتير
والشعر 20 ملم وفوق 25 ملم وفله حمص صغيره جدا والساق ضيقه شبر ونص وشبرين
الطريقه الرابعة
الصيد بالعجين
وهو مشابه للصيد العادى
بس الطعم عجين
دقيق مستوى او عجين عيش
...................................................................................................
الطعوم المطلوبه لمختلف الطرق :
البرغوت لقف وشراء
دود الطين الاحمر
دود السبله
الغله
العجين
الريم
الخضره
صرصار البجر
.......................................................................................................
طريقة عمل عجين العيش البلدى المستوى
عجن العيش المستوى .
تفصل وش الرغيف عن ظهره .
تبل العيش فى ميه مع تصفيته بسرعه .
يترك لمدة ساعة .
ابتدى تعجنه مع إضافة الماء بحذر قليل قليل .
لغايه العجينه ما تتجانس وصوابعك وانت بتعجن تغرز فيها بسهوله .
كورها كور واعجن كل كوره لوحدها وبعدين اعجنهم فى بعض .
إخدم العجينه كويس .
وبس
.....................................................................................................
طريقة عجين الدقيق المستويه
انك تمسح طاسه بالزيت وتصب فيها العجين وتوطى مفتاح البنوجاز
بإدارته عكس التوطيه يعنى تلف لليمين حتى تحصل على اقل بصيص من النار
وتحط الطاسه ولما تصفر حروف العجين اقلبها على الوش التانى وتغرز بعد
قليل شوكه لو طلعت من العجين نظيفه يبقى العجين استوى تطفى النار
و تسيبها تبرد ولو طلع فى الشوكه عجين سيبها على النار شويه .
إترك العجينه تبرد تماما قبل لفها اأو وضعها فى كيس .
اللى عاوز يضيف حاجه يضيفها مايسألنيش
شبه او زيت او سكر او توم او اى حاجه يضيفها.............هو حر .
انا شخصيا لا أستخدم شيئا الدقيق والماء فقط .
.....................................................................................................
المياه الساكنه والمياه الجاريه :
المياه الساكنه او اللى بتجرى ببطء
بتصطاد وانت فى مكانك جنب الهيش او البوص او الحجنه بس اوعى توعر
المياه الجاريه
محتاجه انك تمشى مع المياه وعايزه مجهود شويه
.......................................................................................................
هذا للعلم ولزم التنويه
البوست خاص بى
ما عدا صيد الغله فقط منقول لكثرة كلماته
محبكم
مصطفى نفادى
طريقة الصيد بالغلة
كاتب المقال
Mokbel Mohamed Mokbel
جروب محبي الصيد بالأسكندرية
0 التعليقات: